Kampioni i ri tashmë i Superligës së Kosovë, FC Ballkani, duket se nuk do të ndalet me punë as pas shpalljes kampion. Siç mëson Metro, Komuna e Suharekës do t’ia japë FC Ballkanit një parcelë për ndërtimin e stadiumit, shkruan Gazeta Metro.
Sipas burimeve të Metros brenda klubit të Ballkanit, Komuna e Suharekës do t’ia japë një parcelë, ku do të ketë drejtë për investime. Aty klubi suharekas pritet të ndërtojë një stadium komplet të ri dhe që do të ketë bari natyral.
Ndërkaq stadiumi aktual i qytetit, i cili është me bari artificial nuk do të ndryshojë përveç barit i cili pritet të bëhet natyral.
Në stadiumin e vjetër, pra në atë të qytetit do të stërvitin grupmoshat e reja, pasi që vendi është më adekuat dhe është më i qasshëm, si dhe gjithashtu është në qendër të qytetit duke mos pasur nevojë për transport shtesë.
Siç mëson Metro, stadiumi pritet të jetë në formë të Llapit, vetëm me disa ndryshime më të mëdha dhe hapësirë më të gjerë.
Gjithashtu investitor i projektit të stadiumit do të jetë Arsim Kabashi ‘Cima’, i cili është edhe president i FC Ballkanit.
Dy vite më parë ai pati prezantuar një projekt të stadiumit që pritet të ndërtohet, megjithatë Metro mëson se ky stadium nuk do të bëhet, pasi që kosto është e lartë.