Thomas Muller do të largohet nga Bayern Munich në fund të sezonit. Sulmuesi njoftoi këtë të Shtunë se janë muajt e fundit me fanellën bavareze.
Sulmuesi ka qenë pjesë e gjermanëve gjatë gjithë karrierës së tij, për plot 25 vite, nga moshat deri tek ekipi i parë.
Mullerit i përfundon kontrata në fund të sezonit, ndërsa drejtuesit nuk i kanë rinovuar kontratën, duke sjellë edhe largimin.
“Është e qartë se sot është çdo gjë tjetër veçse një ditë si çdo tjetër për mua. 25 vitet e mia si lojtar i Bayernit do të marrin fund këtë verë.
Ka qenë një udhëtim i jashtëzakonshëm, i shënuar nga përvoja unike, takime të mëdha, tituj të paharrueshëm.
Ndiej mirënjohje dhe gëzim të madh që kam qenë në gjendje të ndjek këtë karrierë në klubin tim të dashur. Lidhja shumë e veçantë me klubin dhe tifozët tanë fantastikë do të mbetet gjithmonë. Ajo që dëshiroj ndërsa largohem duhet të jetë e qartë: titujt që mund të festojmë së bashku.
Ne do të japim gjithçka në javët e ardhshme për ta rikthyer titullin e ligës në Mynih… të arrijmë finalen tonë të shumëpritur të Champions League në shtëpi. Le ta bëjmë këtë”, njofton Muller.
