Thomas Tuchel është shprehur se nuk ka funksionuar siç duhet transferimi Romelu Lukakut nga Inter.
Blutë pësuan një humbje 3-1 ndaj Real Madridit në Stamford Bridge në mesjavë, një rezultat që pothuajse konfirmon daljen e tyre nga kompeticioni. Skuadra e Tuchel tani do të duhet t’i mposhtë “Los Blancos” me tri gola ose më shumë nëse dëshiron të arrijë në raundin tjetër të Ligës së Kampionëve, megjithëse dy gola do të mjaftonin për ta çuar lojën në kohën shtesë.
Duke folur për La Repubblica, Tuchel diskutoi fillimisht për reagimin e tij pas humbjes 3-1 ndaj Real Madridit.
“Isha zgjuar gjithë natën pas ndeshjes. E pashë ndeshjen në TV. Por, isha aq i zemëruar sa, herë pas here, më duhej të bëja një pushim në kuzhinë”, theksoi 43-vjeçari.
Trajneri gjerman më pas dha mendimin e tij për Lukakun dhe sugjeroi se ish-lojtari i Interit nuk mund të fajësohet.
“Romelu ka një shqetësim në tendinën e tij të Akilit, por ne duhet të kapërcejmë lodhjen, përfshirë lodhjen mendore. Unë e dua këtë klub dhe lojtarët. Nuk mund të fajësojmë Romelu-n. Meqë ra fjala, ai hyri në lojë kur rezultati ishte 1-3, edhe pse më pas humbi një rast të mirë. Lukaku nuk na destabilizoi. Ai është profesionist dhe së fundmi është duke u stërvitur shumë mirë. E blemë sepse besuam dhe besojmë në të. Sigurisht që deri më tani ‘martesa’ nuk ka shkuar mirë”, shtoi ai, shkruan lajmi.net.
Së fundi, Tuchel diskutoi të ardhmen e Jorginhos dhe N’Golo Kante dhe vuri në dukje se situata e Roman Abramovich nuk ka ndikuar masivisht në skuadër.
“Kontratat e Jorginhos dhe Kantes do të skadojnë këtë vit, njëjtë edhe e Rudiger. Shpresoj që kjo çështje të rregullohet shpejt. Situata me Abramovich nuk po na destabilizon”, përfundoi ai. /Lajmi.net/
