Presidenti i FIFA-s, Gianni Infantino, ka akuzuar organizata si UEFA se janë të frikësuar nga planet për ta bërë Kupën e Botës një ngjarje që zhvillohet çdo dy vjet.
Infantino po fliste në Kongresin e Konfederatës së Futbollit Afrikan, ku vendet afrikane shprehën mbështetjen e tyre për një Kupë Botërore dyvjeçare.
Studimi i vetë FIFA-s pretendon se tifozët janë në favor të Kupave të Botës më të shpeshta dhe Infantino beson se shoqatat dhe klubet me fuqinë më të madhe kanë frikë nga një ndryshim në status quo, raporton Eurosport, transmeton Klankosova.tv.
“Ata që janë kundër janë ata në krye. Ndodh në çdo sektor të jetës kur ka reforma dhe ndryshime, ata që janë në krye nuk duan të ndryshojnë asgjë sepse janë në krye”, tha Infantino.
“Ne e kuptojmë këtë dhe i komplimentojmë dhe i duartrokasim që kanë qenë kaq të suksesshëm në arritjen e majës. Kjo është fantastike dhe ata janë shembull për të gjithë”, u shpreh tutje ai.
“Por në të njëjtën kohë, ne nuk mund ta mbyllim derën, duhet ta mbajmë derën hapur, duhet të japim shpresë dhe mundësi”.
Ish-menaxheri i Arsenalit, Arsene Wenger, tani kreu i zhvillimit të futbollit global në FIFA, qëndron pas propozimit – i cili nuk ka mbështetjen e klubeve dhe organizatave evropiane, apo CONMEBOL të Amerikës së Jugut.
