Dusan Vlahovic mund të largohet nga Fiorentina në këtë seancë merkatoje dimërore. Fiorentina ka vendosur një shifër për serbin, që nuk pranon të rinovojë, dhe Juventusi po mendon të bëjë ofertë në ditët në vijim.
Vetëm lajmi i tërboi tifozët më të zjarrtë vjollcë, të cilët shfaqën një pankartë jashtë stadiumit të tyre. Një baner pa ekuivoke, që duket se tashmë sanksionon lamtumirën. Një pjesë e tifozëve, ajo që përfaqëson zemrën e mbështetësve të Fiorentinës, tashmë i kanë dhënë lamtumirën Dusan Vlahovic.
Sulmuesi i talentuar serb i ka refuzuar të gjitha propozimet për rinovim, që i ka bërë presidenti Commisso. Përfaqësuesit e tij i kanë thënë “jo” Arsenalit dhe mesa duket nuk i janë përgjigjur as Tottenhamit.
Vlahovic, golashënuesi më i mirë në Serie A (bashkë me Ciro Immobile), dëshiron vetëm Juventusin, klub që e ka tërhequr prej disa kohësh. Marrëveshja ekonomike mes palëve tashmë është gjetur. Vlahovic pritet të fitojë 7 milionë euro neto në sezon, plus bonuse.
Tani klubi bardhezi do të përpiqet të bindë Fiorentinën, gati ta shesë lojtarin, por nuk dëshiron të bëjë zbritje. Zyrtarisht, Commiso kërkon 70 milionë euro, por ndjesia është se me 60 milionë gjithsej negociatat mund të mbyllen, me vjollcët që nuk pranojnë homologë teknikë.
Lamtumira e Vlahovic duket se është e afërt dhe tifozët e Fiorentinës, me të cilët ai nuk ka pasur gjithmonë marrëdhënie të relaksuara, i kanë marrë keq lajmet e fundit. Duke pasur parasysh edhe urrejtjen historike që ata kanë me Juventusin, janë shprehur me një pankartë, ku shkruhej: "Respekti nuk fitohet me gola! Vlahovic, gungaç mu*i".
Kësisoji, Vlahovic duket i destinuar të ndjekë rrugën e Chiesa dhe Bernardeschi, të cilët kaluan nga Fiorentina te Juventusi sezonet e kaluara.
