Florian Pervathi, 17-vjeçari i cili vrau dje 65-vjeçarin Lek Lekgjonajn, në Lezhë nuk ka shfaqur pendesë për krimin. Në polici tha se vrasjen e kreu për gjakmarrje, për të marrë hakun e babait të tij.
Në vitin 2009 vëllai i viktimës së djeshme ka vrarë babin e 17-vjeçarit, i cili asokohe ishte shumë i vogël. Floriani humbi edhe nënën sepse ajo u vetëhelmua pasi i vranë të shoqin.
I rritur pa të dy prindërit, duke se 17-vjeçari e ka pasur motiv për të vënë në vend sipas tij drejtësinë e munguar. Ende mbetet e paqartë se ku e ka gjetur armën adoleshenti që sipas gazetarëve, zakonisht përdoret nga qitës profesionist.
Duket se gjithçka e kishte planifikuar. Ditën e djeshme ai e ka pritur 65-vjeçarin dhe në momentin që ky i fundit ka zbritur nga makina e ka qëlluar duke i shkaktuar vdekjen e menjëhershme.
17-vjeçari nuk ka treguar kush e dërgoi në komisariat pasi kreu vrasjen, ndërsa do të rimerret sërish në pyetje në prani të psikologëve, pasi gjendja e tij është tepër e rënduar.
