Notarja kosovare Eda Zeqiri e ka zhvilluar të mërkurën garën e fundit në Kampionatin Botëror të Sporteve të Ujit, që po mbahet në Doha të Katarit.
19-vjeçarja garoi në disiplinën 50 metra shpinë, ndërsa ishte e 41-ta në kualifikime. Koha e Edës ishte 30.69 sekonda. Notarja kosovare i la 14 notare prapa.
Rezultati i fundit që siguroi biletën për gjysmëfinale ishte 28.46 sekonda.
Vitin e kaluar Eda Zeqiri në Botëror në disiplinën e njëjtë kishte kohë prej 30.96 sekonda.
Në Botëror pos Eda Zeqirit ka garuar edhe Mal Gashi. Ka bërë bujë mbetja jashtë Botërorit e notares së talentuar Hana Beiqi. Sipas klubit të saj dhe Komitetit Olimpik të Kosovës, Hana Beiqi është diskriminuar duke mos u dërguar në Botëror. Por Federata e Notit ka mohuar akuzat. Megjithatë FNK-ja nuk ka sqaruar se pse nuk e ka dërguar Hanën në Botëror, ndonëse numri i pjesëmarrësve nuk ishte i kufizuar në dy.
