Qeveria e Kosovës në mbledhjen e mbajtur të mërkurën ka miratuar tri vendime për shpronësim të pronave për interes publik.
Kabineti qeveritar ka miratuar propozimvendimin përfundimtar për shpronësim për interes publik të pronave të paluajtshme të cilat preken nga realizimi i projektit “Mbrojtja dhe menaxhimi i trashëgimisë kulturore, konservimi dhe investimi në lokalitetin arkeologjik ‘Municipiumi Ulpinana – Justiniana Secunda’”, pjesë e trashëgimisë në mbrojtje të përhershme.
Gjithashtu është miratuar propozimvendimi përfundimtar për shpronësim për interes publik të pronave të paluajtshme të cilat preken nga realizimi i projektit “Zgjerimi i rrugës nacionale N9 Kijevë-Zahaq, segmenti Kijevë-Dollc”.
Qeveria në këtë mbledhje ka miratuar edhe propozimvendimin përfundimtar për shpronësim për interes publik të pronave të paluajtshme të cilat preken nga projekti “Ndërtimi i autostradës Prishtinë-Gjilan-Dheu i Bardhë, segmenti Banullë-Bresallc”.
Në mbledhjen e Qeverisë është miratuar edhe Projektligji për ratifikimin e marrëveshjes për bashkëfinancim për hartimin e projektit për ndërtimin e tunelit në rrugën Tetovë – Prizren.
Qeveria ka miratuar edhe Projektligjin për Gjykatën Administrative.
Gjithashtu Qeveria ka miratuar Projektligjin për ratifikimin e marrëveshjes me Bashkimin Evropian (BE) për pjesëmarrjen e Kosovës në programin e BE-së “Drejtësia”.
Qeveria ka miratuar edhe kërkesën e Ministrisë së Kulturës, Rinisë dhe Sportit për marrjen në shfrytëzim të pronës në zonën kadastrale Gënçar, Komuna e Prizrenin, e menaxhuar nga Agjencia Pyjore e Kosovës.
Gjithashtu është miratuar edhe propozim vendimi për të kërkuar nga presidentja Vjosa Osmani, dhënien e autorizimit për zëvendëskryeministrin Besnik Bislimi, për nënshkrimin e amendamentimit të marrëveshjes financiare ndërmjet Kosovës dhe BE-së për programin IPA 2020.
Qeveria ka miratuar edhe tri nisma për lidhje të marrëveshjeve me Malin e Zi. Një për ndihmë të ndërsjellë juridike në çështjet penale, një për zbatimin e ndërsjellë të vendimeve gjyqësore në çështjet penale dhe një nismës për lidhjen e marrëveshjes për ekstradim.
Gjithashtu është miratuar edhe nisma për lidhjen e memorandumit të mirëkuptimit për njohje reciproke dhe konvertim të patentë shoferëve në mes të Qeverisë dhe Emirateve të Bashkuara Arabe.
Qeveria ka miratuar edhe nismën për lidhjen e marrëveshjes së grantit në mes të Kosovës dhe Bankës ndërkombëtare për rindërtim dhe zhvillim për projektin “Programi-nxitja dhe levimi i mundësive për siguri të ujit”.
Qeveria ka miratuar edhe draftin e Strategjisë së sistemit inteligjent të transportit në Kosovë për vitet 2024-2030 draftin e konceptdokumentit për farërat.
Në këtë mbledhje zëvendëskryeministri Besnik Bislimi ka informuar kabinetin qeveritar mbi zbatimin e Programit kombëtar për integrim evropian gjatë vitit 2023 dhe për të arriturat në zbatimin e fazës së dytë të prioriteteve politike të dakorduara nëpërmjet BE-së dhe Kosovës – Agjendës për Reformë Evropiane.
