Stefano Pioli ishte shprehur më parë se nuk e shikon Ibrahimovic si pjesë e projektit për të ardhmen. Tashmë është e sigurt, sulmuesi suedez do të largohet nga kuqezinjtë në fund të këtij sezoni.
Sipas “Sportmediaset”, kontrata e 41-vjeçarit me “djallin” skadon në fund të sezonit, dhe kuqezinjtë nuk do të rinovojnë me të.
Mbrëmjen e nesërme, në fund të ndeshjes së fundit të kampionatit, Milani do të përshëndesë Ibrahimovic me një ceremoni të shkurtër që do të përshijë të gjithë skuadrën.
Zlatan në karrierën e tij luajti për Milanin gjithsej 6 sezone të ndara në dy pjesë. Periudha e parë e suedezit me kuqezinjtë ishte në vitet 2010-2012 dhe periudha e dytë nga 2020-2023. Në total, sulmuesi suedez luajti për Milanin 163 ndeshje dhe shënoi 93 gola.
