Në prag të ndeshjes së sotme në Premier League ndaj Everton, trajneri i Liverpool, Jurgen Klopp, u shpreh se është 100% i përkushtuar ndaj skuadrës pavarësisht rezultateve jo të mira. Ai u shpreh se edhe më herët në karrierën e tij ka kaluar të tilla situata delikate dhe se nuk mendon për largimin nga “reds”.
“Nuk do të largohem dhe nuk mund të shkoj asgjëkundi, pasi kam shumë përgjegjësi për detyrën që jam duke kryer. Këto janë momente të vështira dhe nuk më pëlqen kjo situatë. Ky klub është kaq i veçantë sepse ne besojmë në çdo gjë. Nëse njerëzit besojnë tek unë, atëherë ne mund ta kalojmë këtë së bashku, sepse pas stuhisë vjen gjithnjë kohë e mirë”, tha Klopp.
“Ndoshta kohët e vështira janë paksa të gjata në këto momente dhe kjo e bën vërtet të vështirë sezonin, por nuk mendoj për largime. Unë jam këtu, 100% i përkushtuar. E kam thënë edhe më parë, nëse fitojmë, ndihem sikur jam pjesë e saj, por nëse humbim, ndihem 100% përgjegjës. Unë kam qenë gjithmonë kështu, kështu që mund ta imagjinoni sa e madhe është përgjegjësia”, tha Klopp.
“Ne do të bëjmë absolutisht gjithçka për ta kaluar këtë dhe për t’u përgatitur për një të ardhme pozitive përsëri. Duhet të jemi të qetë dhe të zgjuar dhe t’i bëjmë gjërat në momentin e duhur. Është një moment ku jam shumë emocional, por jam plotësisht i qartë dhe mund të bëj punën që kam bërë gjithmonë. Kam mjaft përvojë për të ditur se mund ta kalojmë këtë”, u shpreh Klopp.
