Miroslav ‘Ciro’ Blazevic do të mbahet mend gjatë për periudhën e tij të shkurtë te skuadra e Prishtinës. Trajneri legjendar kroat, i cili ndërroi jetë sot, i kishte impresionuar të gjithë futbollistët e gjeneratës së artë të bardhë e kaltërve, transmeton Gazeta Metro.
Një nga të impresionuarit është edhe trajneri i njohur kosovar, Afrim Tovërlani.
Tani përzgjedhësi i Kosovës U21 gjatë Kampionatit Botëror në emisionin ‘Dueli Botëror’ në RTV Dukagjini kishte zbuluar prapaskena interesante rreth të ndjerit.
Tovërlanit iu kishte kujtuar Blazevic, pasi atë ditë Kroacia mposhti Marokun (2-1) dhe zuri vendin e tretë në Kupën e Botës. Fitoren përzgjedhësi kroat Zlatko Dalic ia dedikoi Blazevic’it.
Tovërlani thoshte se legjenda kroate kishte qenë një trajner karizmatik, ku përmendte një rast para një ndeshje atë kohë shumë të rëndësishme kundër skuadrës kroate Osijek.
”Trajner karizmatik, domethënë një trajner që shumë më tepër ka ana psikologjike se sa nga ana profesionale në futboll. Tre muaj ka qëndruar në Prishtinë prej marsit deri në qershor të vitit 1985 dhe më kujtohet një ndeshje kur luajtëm në Osijek. Ne luftonim për mos me ra prej ligës së parë të ish-Jugosllavisë dhe në mëngjes shkruante gazeta sportive në gjuhën kroate se ata janë ‘ujqërit’ për Osijekun.”
”Mirëpo, kur hyri në zhveshtore të mbajë mbledhjen para se të dalim në fushë ia nisi me atë tonin e tij të lartë: ”Këta janë ujqërit, nëse këta janë ujqërit ne jemi ujqërit e uritur. Pse janë krejt kundër plisave të bardhë.” Dhe në atë mënyrë filloi të ngrit adrenalinën dhe tensionin. Atë ndeshje humbëm 2-1 me një padrejtësi të madhe…., por megjithatë ndeshjen e fundit e fitoi Prishtina 1-0 në Rijekë dhe me Ciron shpëtuam pa rënë prej ligës,” kishte thënë ai.
Blazevic para se të emërohej trajner i Prishtinës kishte udhëhequr skuadrën zvicerane Grasshopper.
Ndërkaq, Tovërlani kishte zbuluar se si personat që kishin udhëtuar në Zvicër për ta sjellë kroatin në Prishtinë nuk kishin pasur të holla të mjaftueshme.
”Prishtina kur ka shkuar ta marrë nga Zvicra për ta sjellë në Prishtinë, këta që kanë udhëtuar për ta marrë Ciro Blazevic as paret e biletave nuk i kanë pasur dhe ju kanë thënë qysh keni me ardh me marrë Ciron as paret e biletat si keni në xhep dhe ata i kanë thënë se krejt në Prishtinë t’i japim sepse këta kanë shkuar fillimisht vetëm të flasin,” kishte thënë ai.
Blazevic gjatë karrierës së tij ka qenë trajner i shumë skuadrave, por suksesi më i madh i tij llogaritet në 1998 ku me Kroacinë kishte arritur të pozicionohet në vendin e tretë në Kupën e Botës në Francë.
Ndërkaq, në nivel klubesh me Dinamo Zagreb kishte korrur sukseset më të mëdha. /gazetametro.net
