Gjyqi për shpifje kundër Fabrizio Corona për flirtin e dyshuar mes Brozovic dhe Wanda Nara është pasuruar me një kapitull të ri, pas seancës së djeshme, në të cilën duhet të ishin paraqitur për të dëshmuar Ivan Perisic dhe Mauro Icardi.
Ky i fundit ngriti një padi civile së bashku me Wanda dhe Brozovic, për artikullin e shkruar nga Fabrizio Corona në revistën e tij në vitin 2019 me titull "Mauro Icardi divorcohet nga gruaja e tij. Wanda Nara tradhtoi partnerin e saj me Marcelo Brozovic".
Tetorin e kaluar, as Perisic dhe as Icardi nuk ishin paraqitur në seancën dëgjimore. Kroati sepse ishte i përfshirë në Champions League me Tottenham, sulmuesi argjentinas sepse nuk kishte komunikuar adresën e tij të re pas lëvizjes në Turqi. Për këtë arsye, gjyqtari i kishte kërkuar prokurorit që të njoftonte shtyrjen e seancës së caktuar për ditën e djeshme, për t’i dëgjuar palët.
Perisic, për të cilin ishte urdhëruar edhe shoqërim i detyruar, u paraqit siç duhet në Gjykatën e Milanos për të dhënë dëshminë e tij. Nuk ka asnjë lajm për Icardin, përveç se mëngjesin e djeshëm është stërvitur rregullisht me Galatasaray në Turqi, siç e dëshmojnë edhe llogaritë sociale të klubit që kanë publikuar imazhe të argjentinasit në fushë me bashkëlojtarët e tij.
Mungesa e argjentinasit, nëse konfirmohet, do të sjellë zhbërjen e padisë së tij, ndaj gjyqi do të vazhdojë vetëm për Wanda Narën dhe Brozovic kundër Corona. Në seancën e mëparshme, ky i fundit kishte pohuar me një deklaratë spontane se nuk dëshiron të pranojë tërheqjen e mundshme të Icardit, pasi pas ndarjes me gruan mund të kishte ndryshuar version: "Marrëdhëniet ndryshojnë dhe kur ndryshojnë e vërteta del në pah. Unë dua që ju të vini këtu dhe të tregoni se çfarë ka ndodhur".
Ndërkohë, sipas shtypit argjentinas, në orët e fundit Icardi ka kërkuar kujdestarinë e përbashkët të vajzave të tij Francesca (8 vjeçe) dhe Isabella (6) dhe mbi të gjitha i ka prerë fondet gruas së tij duke i bllokuar kartën e kreditit dhe gjithashtu pengimin e saj nga përdorimi i avionit privat. Një tjetër histori që së shpejti mund të zhvendoset në sallën e gjyqit.
