Në Superligën e Kosovës në basketboll në kuadër të xhiros së 19’të sot do të zhvillohen dy ndeshje interesante, ku vëmendja kryesore do të jetë në Pejë, transmeton Gazeta Metro.
Me fillim nga ora 17:00 në palestrën sportive ‘Karagaçi’ do të ndeshen dy rivalët e vjetër, Peja dhe Trepça.
‘Minatorët’ vijnë pas disfatës javën e kaluar ndaj Sigal Prishtinës me rezultat të thellë 53:88, teksa vendasit pas fitores në Gjakovë (57:81) përballë Vëllaznimit.
Pejanët këtë edicion kanë 13 fitore e pesë humbje, kurse mitrovicasit nëntë fitore e nëntë humbje.
Ballafaqimi i fundit për këtë javë është mes Golden Eagle Yllit dhe Vëllaznimit që do të luhet në Suharekë në palestrën ’13 qershori’ në ora 19:00.
Suharekasit në mesjavë luajtën ndeshjen e mbetur kundër Rahovecit, ku fituan me rezultat 70:99 dhe kështu vazhduan ecurinë fantastike prej 14 fitoreve radhazi.
Kampioni në fuqi i Kosovës mban kreun e tabelës me 32 pikë, kurse gjakovarët kanë shtatë fitore e 11 humbje.
Kujtojmë se dje Sigal Prishtina triumfoi në shtëpi ndaj Bashkimit (86:68), ndërsa Ponte Prizreni mposhti Rahovecin (63:85). /gazetametro.net
