Tottenham ka mbjellur një pemë në terrenin stërvitor në shenjë kujtimi për përgatitësin fizik të skuadrës, që humbi jetën para pak ditëve. Vetë Antonio Conte e bëri këtë me sy të përlotur, zemrën që i dridhej dhe mendimet që shkonin te Gian Piero Ventrone, i cili vdiq nga leuçemia akute.
Po flasim për krahun e djathtë të trajnerit të “Spurs”, i cili u nda nga jeta në mënyrë të papritur prej sëmundjes së rëndë. Në kampin stërvitor të Tottenham, skuadra dhe stafi teknik u mblodh rreth lisit të gjelbër të mbjellë pranë fushës.
Para seancës stërvitore, të gjithë mbajtën edhe një minutë heshtje për të ndjerin Ventrone. Ishte një ritual simbolik, një gjest plot dashuri për të kujtuar përgatitësin atletik dhe bashkëpunëtorin e ngushtë të Conte.
Të dy bashkë punuan që në kohën e Juventusit, e vijuan eksperiencën edhe në Londër. Ata ishin gati të jepnin gjithçka, edhe përtej kufijve të tyre. “Më shtyu të tejkaloj mundësitë e mia reale”, – është fraza që rikthehet disa herë në deklaratat e teknikut nga Salento për bashkëpunëtorin e tij të ndjerë.
Dhimbja u shkri në lot në funeralin e zhvilluar ditët e kaluara në kishën e San Luigi Gonzaga të Napolit. Para ndeshjes së kampionatit me Brighton, futbollistët veshën një fanellë që përcillte një mesazh simbolik (“përgjithmonë në zemrat tona” fjalët kushtuar Ventrone). Minutat pas fishkëllimës hapëse të ndeshjes ishin gjithashtu tronditëse, me kamerat që fokusuan fytyrat e lojtarëve dhe në veçanti të Antonio Conte.
Ai mezi i mbante lotët dhe në një moment, ndërsa ishte ulur në stol, e mbuloi fytyrën në duar dhe u përpoq të mos kapej i përlotur. Trajneri i “Spurs” ishte i shkatërruar dhe i mbërthyer nga emocionet.
Disa gjëra të gërmojnë së brendëshmi, ajo që mbetet është një ndjenjë e thellë e melankolisë. "E vlerësoja shumë sepse ishte punëtor i madh dhe, për mua, shkencëtar i profesionit të tij", – tha Conte, sipas së cilit çdo gjë shpërbëhet, por jo gjithçka humbet.
