Juventus bëri debutimin parasezonal mbrëmë, duke mposhtur meksikanët e Chivas Guadalajara në një miqësore në Las Vegas. 2-0 ishte rezultati përfundimtar, me golat e të rinjve Da Graca dhe Compagnon.
Në fushë nuk ishte e gjithë mbrojtja titullare e sezonit të kaluar: Chiellini, De Ligt dhe Bonucci. Dy të parët u nisën për në brigje të tjera, përkatësisht në Los Angeles dhe Mynih, i fundit mbeti gjatë gjithë kohës në stol (si Vlahovic dhe McKennie).
35-vjeçari nga Viterbo është i fundit i mbetur nga mbrojtja e Juventusit të vjetër. I takon atij ta udhëheqë ekipin në fushë dhe në dhomat e zhveshjes, falë shiritit të kapitenit të trashëguar nga Chiellini.
“Më në fund ia dola, – bën shaka Bonucci. – Gjithmonë kam luajtur rolin tim në dhomat e zhveshjes, tani jam më i moshuari i grupit dhe shembulli, përgjegjësia dhe krenaria e veshjes së kësaj fanelle do të duhet të jenë edhe më të forta.
Një kapiten i mirë duhet mbi të gjitha të ketë një grup të mirë pas tij. Këto ditë po shoh te Juventusi dëshirën për të qenë bashkë dhe entuziazmin. Duhet të jesh i ashpër kur të duhet dhe të buzëqeshësh kur të mundesh".
Si kapiten, Bonucci nuk kalon shumë kohë për t’i dërguar një mesazh publik Matthijs de Ligt, pasi tashmë është përballur me të privatisht: “Largimi i tij nuk më befasoi, sepse në disa nga deklaratat e tij la të kuptohej se nuk donte të qëndronte te Juventusi.
Sidoqoftë, unë mendoj se në bazë të gjithçkaje nevojitet respekti. Grupi me të cilin ishte për tri vite e ndihmoi të rritej si futbollist, pastaj klubi ka investuar shumë për të. I uroj atij më të mirën, por disa fraza të thëna në kombëtare nuk ishin shumë të bukura.
Ne folëm për këtë pas pushimeve dhe ai e kuptoi. Bayerni është një klub i madh, por nuk është e sigurt që në një top-ekip je i destinuar të fitosh".
