Kampioni i Kosovës, Ballkani do ta luajë sonte ndeshjen e radhës në garat evropiane, raporton FrontOnline.
Skuadra nga Suhareka i nisi garat në rundin e parë eliminator të Ligës së Kampionëve, ku befasisht u eliminua nga Zalgirisi i Lituanisë.
Ndërkaq, tashmë, Ballkani ka rënë në Ligën e Konferencës, ku në rundin e dytë eliminator, do të ndeshet me La Floritan e San Marinos.
La Florita është nikoqire e Ballkanit në ndeshjen e parë që luhet sonte nga ora 20:45 në “San Marino Stadium”.
Trajneri i skuadrës La Fioritas, Oscar Lasagni ka folur në një konferencë për media në prag të ndeshjes së parë të rrethit të dytë eliminator në Ligën e Konferencës kundër kampionit të Kosovës, Ballkanit.
Lasagni ka vlerësuar lart skuadrën kosovare duke thënë se ata kanë një përbërje sulmuese.
“Një rund i dytë është gjithmonë sfidues, por mendoj se mund të bëjmë një ndeshje të mirë. Kam parë shumë ndeshje. Ata janë një ekip agresiv, që luajnë shumë lart dhe që e nisin nga fundi aksionin. Një formacion mjaft sulmues. Luajnë kryesisht me 4-3-3 ose 4-2-3-1. Ata janë shumë fizikë dhe të shpejtë, një ekip i mirë”, tha në konferencë trajneri i La Fioritas, Oscar Lasagni, njoftojnë mediat lokale, përcjell FrontOnline.
“Ne gjithmonë do të adoptojmë qasjen tonë taktike që na ka karakterizuar gjatë gjithë vitit. Ne nuk do të ndryshojmë frymën tonë të lojës dhe për aq sa është e mundur, do të përpiqemi të luajmë një lojë sulmuese”, shtoi Lasagni./FrontOnline/
