Në pritje për të përfunduar parakalimin ndaj Keylor Navas, por me peshën e madhe të gafës së fundit ndaj Real Madridit, që hapi rrugën e përmbysjes së madhe dhe eliminimit të parizienëve nga Champions-i, dhe kështu të bëhet titullari i përhershëm i portës së Paris Saint-Germain, Gianluigi Donnarumma vazhdon të jetë entuziast për zgjedhjen e bërë, transferimin te klubi francez.
Ish-portieri i Milanit, i cili pas pak ditësh do të angazhohet me Italinë në "play off"-in shumë delikat kualifikues për "Katar 2022", ka dhënë një intervistë për "BeIn Sports". Në të është rikthyer tek arsyet që e shtynë të pranojë propozimin e presidentit Al Khelaifi.
Siç ka ndodhur tashmë në intervista të tjera, Donnarumma përsëriti se një rol kyç në zgjedhjen përfundimtare e ka luajtur Gianluigi Buffon, paraardhësi i ish-lojtarit të Milanit mes shtyllave të Italisë, por edhe si portier i PSG-së, ndonëse për vetëm një sezon, 2018-2019: “Buffon më tha të vija këtu dhe të bëhesha pjesë e historisë së PSG".
Gigio më pas zbuloi se si interesimi i parizienëve ishte i gjatë dhe këmbëngulës, pavarësisht se zyrtarizimi erdhi vetëm në mes të korrikut të kaluar, pas përfundimit të "Euro 2020": “PSG nuk hoqi dorë kurrë nga unë, ardhja këtu ishte fati im. Jam shumë krenar që u bëra pjesë e këtij klubi”.
Donnarumma duket se e ka harruar tashmë Milanin, i cili nga ana e tij ka hapur një cikël të ri dhe deri tani të kënaqshëm në portë me Mike Maignan. Ish-portieri i Lille mori një kohë të shkurtër për të fituar zemrat e tifozëve kuqezinj, si brenda dhe jashtë fushës.
