Massimiliano Allegri prezantoi ndeshjen e parë të 1/16 së Ligës së Kampionëve ndaj Villarreal në një konferencë për shtyp. Juventusi vjen nga barazimi zhgënjyes 1-1 me Torinon, por në Europë synon të ndryshojnë fytyrë, pavarësisht se ka disa mungesa, përfshirë edhe atë të Dybala. Spanjollët e Unai Emery fituan Ligën e Evropës vitin e kaluar dhe mund të llogarisin nesër në mbrëmje një mbështetje të madhe në shtëpi:
"Nuk është një kundërshtar i lehtë, kemi 50% për t’u kualifikuar. Villareal është një ekip me përvojë, që ka një trajner shumë të mirë. Nuk jemi aspak favoritë, por mendoj se është një ndeshje taktike. Nuk mund të kualifikohemi nesër, nëse nuk fitojmë 3 ose 4-0. Shpresoj të kualifikohemi në fund të 180 minutave lojë.
Sfidat e fundit? Nuk jam dakord me atë që bëri Juventusi kundër Torinos dhe Atalantës. Megjithatë, gjërat janë duke shkuar mirë, por na duhet ekuilibër. Nuk ishim i njëjti ekip si tani, me Vlahovic. Dusan do të debutojë nesër në Champions, por nuk mund t’ia ngarkojmë të gjitha përgjegjësitë e sulmit.
Si trajner do të duhet ta mbroj atë, kjo është normale. Kur të luajë 60 ndeshje në Champions League, do të jetë ndryshe për të. Është një çështje psikologjike dhe presioni. Formacioni? Morata dhe Vlahovic luajnë përpara, kam dyshime në mesfushë. Rabiot ka marrë një goditje, por është në dispozicion. Pellegrini është kthyer, Bonucci do të jetë në dispozicion nga e shtuna.
Arthur? Jam i lumtur me të. Kam dyshime në mesfushë mes tij, Locatelli, McKennie, Rabiot dhe Zak. Më duhet të vlerësoj dhe të startoj me tre nga këto pesë emra. McKennie është një mesfushor-sulmues. Ai ka gola në këmbë dhe karakteristika të ndryshme nga të gjithë ata lojtarë që kemi në dispozicion".
