Derbi i kryeqytetit mes Tiranës dhe Dinamos, nuk prodhoi fitues, duke u mbyllur në barazim pa gola.
Në ndeshjen e zhvilluar në Vlorë, dy ekipet kërkuan triumfin nga fillimi, por në fund u detyruan të ndajnë nga një pikë.
Pjesa e parë u mbyll me rrjetat të paprekura, ndërsa në të dytën Tirana kaloi në avantazh me Soler, por goli u anulua për pozicion jashtë loje.
Të njëjtin fat kishte edhe Dinamo në minutën e 73-të, që pa të anulohej për të njëjtën arsye goli i Lorenco Vilës.
Në minutat e mbetura, skuadra e Shkëmbit ishte më kërkuese, duke goditur edhe traversën, por goli mungoi.
Me këtë barazim, Tirana mban vendin e shtatë me 10 pikë, ndërsa Dinamo renditet në vendin e tretë me 15 pikë.
Edhe dueli tjetër mes Egnatias dhe Teutës i pati të gjitha përveç golave (karton të kuq, shumë raste dhe penallti të humbur).
Ndërkohë, Laçi ka marrë fitoren e parë për këtë sezon. Kurbinasit mposhtën me shifrat 3-1 Vllazninë, duke lënë kështu vendin e fundit.
