Amir Rrahmani, është padyshim futbollisti i vitit në Kosovë. Duke marrë parasysh statistikat e tij, lojën e tij si dhe vlerën e tij të ngritur në treg, Rrahmani patjetër qe e meriton këtë epitet, shkruan Gazeta Metro.
Në dhjetor të 2021, Federata e Futbollit e Kosovës (FFK) ka shpallur laureatët e vitit 2021 përmes një manifestimi ku kanë marr pjesë vetëm fituesit, por jo edhe mysafirë të tjerë, shkaku i masave në fuqi për mbrojtje nga Covid-19.
Çmimin kryesor, futbollist i vitit, e ka fituar ylli i Kombëtares së Kosovës, kapiteni Amir Rrahmani, i cili po kalon formë fantastike në kampionatin italian me Napolin, ndërkohë te ekipi i ‘Dardanëve’ është bërë lider skuadre.
Rrahmani i ka zhvilluar 22 ndeshje këtë sezon, respektivisht 1.598 minuta të luajtur. Ndër të tjera, i ka realizuar edhe dy gola në fanellën e Napolit.
Amiri ishte transferuar në Napoli pas eksperiencave pozitive në Dinamo Zagreb dhe në Verona.
Ai është bërë njëri prej futbollistëve më të rëndësishëm te Napoli, skuadër kjo që po lufton për titull të kampionit në Serie A, ku aktualisht është e dyta me 39 pikë, vetëm katër pikë prapa kryesuesit, Interit.
Vetëm pas tri-katër xhirosh në kampionatin italian, Rrahmani shpejt kishte filluar të zë vend në skuadër, duke e arsyetuar çdo minutë loje dhe kështu është bërë shtyllë e fortë e Napolit, duke ia zënë vendin në formacionin kryesor Kostas Manolas, i cili u detyrua të kthehet në Greqi, pasi vendin në Napoli ia zuri ylli kosovar.
Së fundmi, Rrahmanit, pas formës së mirë që është duke e kaluar te skuadra napolitane, në ‘Transfermarkt’ i është rritur vlera nga 16 milionë euro në 22 milionë euro. /gazetametro.net
