Interi i Simone Inzaghit fiton, por mbi të gjitha bind në aspektin e lojës, siç ka ndodhur rrallë në historinë e zikaltërve. Aq shumë, sa tani shumë po pyesin: a është ky Inter më i miri ndonjëherë? Një përgjigje fillestare vjen nga Marco Materazzi, dikush që ka luajtur dhe ka fituar gjithçka me Interin.
Ish-mbrojtësi nuk ka asnjë dyshim kur bëhet fjalë për të krahasuar ekipin e sotëm me atë që ishte në gjendje të fitonte tripletën e 2010-ës. “Sinqerisht them se Interi i sotëm luan më mirë se ne më 2010. Është me të vërtetë një kënaqësi ta ndjek. Meritat duhet t’i jepen Inzaghit, i cili e kuptoi se si të mos shpërdoronte talentin.
Mjafton vetëm t’i bësh lojtarët e fortë të ndihen mirë së bashku për të marrë rezultate, edhe pa shpikur kush e di se çfarë. Dhe pastaj menaxherët e klubit kanë bërë shumë pak gabime vitet e fundit në merkato, janë vërtet shumë të mirë. Nga Mkhitaryan te Barella, ata e dinin se kishin rrënjë të forta, përkatësi, seriozitet. Kështu e ndërtuan këtë ekip, që duket perfekt", – vëren Materazzi, i intervistuar nga “Gazzetta dello Sport”.
Nga ana tjetër, ish-mbrojtësi ka besuar gjithmonë në vlerën e skuadrës aktuale: "A po shkohet drejt titullit? Nuk kam pasur asnjë dyshim, kam qenë i sigurt që në fillim të sezonit. Ky Inter ka shumë cilësi dhe bindje pas finales së Stambollit, është qartësisht superior”.
Megjithatë, në Ligën e Kampionëve rruga është ende e gjatë dhe pengesa e parë nuk ngjall kujtime të ëmbla për Materazzin: "Simeone? Unë kam një kujtesë të keqe, të gjithë e dinë se çfarë është 5 maji 2022, kështu që është më mirë të mos flasim. Kjo mund të jetë vërtet pengesa më e vështirë drejt finales.
Interi është bërë një makinë, mund të provojë ndaj kujtdo pa frikë. Në ndeshjen e parë në ‘San Siro’ mund të kishim shënuar më shumë, por skuadra nuk lëkundet më. Sigurisht, në Madrid do të jetë një sfidë e ashpër. Paguhen shtrenjtë gabimet kundër kundërshtarëve të tillë mendjemprehtë".
Së fundi, i pyetur se kush është Materazzi i ri, ish-mbrojtësi përmend dy emra: “Acerbi ndoshta më afrohet për shkak të historisë, sepse u shugurua vonë. E shoh veten edhe te Bastoni, pjesërisht në fizikun e tij dhe pjesërisht mënyrën si luan me këmbën e majtë”.
