Ilir Daja, trajneri i kampionit të dy edicioneve të fundit në elitën kosovare të futbollit, ka thënë se lojtarët e Ballkanit kanë problem psikologjik dhe jo të cilësisë.
Ai tha pas ndeshjes për “ArtMotion” se pavarësisht barazimit me Gjilanin, Ballkani do të luftojë deri në fund të kampionatit për një tjetër titull kampioni.
“Po humbim shumë raste dhe po marrim gola të lehtë. Sot luajtëm mirë dhe bëm gabimin që po na përsëritet. Kishim topin në posedim, pa presion të kundërshtarit, dhe gabuam. Këto janë gabime psikologjike sepse duam të bëjmë më të mirën. Nuk jemi në formën më të mirë sepse lojtarët kryesorë nuk janë në formë. Ata në zona të vogla dhe në finalizim kanë zgjidhje më të mira në momente të caktuara. Nuk është problem besimi, sepse besimi është maksimal. Jemi në garë për titull sepse jemi lartë në tabelë dhe kanë mbetur edhe 14 ndeshje. Me gjithë kontingjentin e lojtarëve që kemi do të mundohemi deri në fund. Kemi probleme psikologjike dhe disa lojtarë nuk janë në formën më të mirë”, deklaroi Daja pas ndeshjes.
