Jose Mourinho e quajti shkarkimin e tij të fundit nga Roma të papritur dhe të padrejtë, derisa ka thënë se pronarët e klubit nuk kanë njohuri për futbollin.
Trajneri 61-vjeçar u shkarkua nga “Giallorossët” më 16 janar pas një humbjeje të dhimbshme 3-1 ndaj Milanit, rezultat që e la skuadrën e tij të shtatën në tabelën e ligës. Ai u zëvendësua nga ish-mesfushori Daniele De Rossi, i cili nënshkroi një marrëveshje gjashtëmujore.
Mourinho fitoi Ligën e Konferencës në sezonin e tij të parë dhe e çoi Romën në finalen e Ligës së Evropës, përcjellë KosovaPress.
Duke folur për “Football.com”, Mourinho së pari diskutoi fazat e eliminimit të garave evropiane këtë sezon dhe shkarkimin e tij të fundit nga Roma.
Grupet evropiane janë gati të fillojnë, në veçanti Liga e Kampionëve, ndoshta gara më e rëndësishme në kalendarin botëror. Nuk do të jem aty në këto faza finale, jo sepse jam eliminuar tashmë, por sepse jam eliminuar nga dikush që di pak për futbollin. Kjo është jeta, plot ulje-ngritje, dhe unë po rritem, pavarësisht shkarkimit të papritur dhe të padrejtë. Por unë do të kthehem, me më shumë entuziazëm dhe besim, për këto ndeshje të UEFA-s.”, ka thënë Mourinho.
Mourinho zhvilloi 138 ndeshje në krye të Romës gjatë periudhës së tij 30-mujore në kampionat, duke marrë 68 fitore, 30 barazime dhe 40 humbje.
