Xhudistja Loriana Kuka është ndalur në xhiron e parë në garën Grand Prix në Odivelas të Portugalisë.
Loriana garoi të dielën në kategorinë deri 78 kilogramë dhe përballë e kishte kroaten Karla Prodan. Lufta ndaj saj ishte e fortë.
24 sekonda para fundit, Loriana realizoi hedhje që u vlerësua me uazari. E vazhdoi aksionin me luftë në dysheme deri në fund të kohës të rregullt.
Uazari nënkupton fitore pas kohës së rregullt.
Gjyqtarja në arenë kërkoi më pas rishikim të situatës dhe komisioni i gjyqtarëve e anuloi uazarin e Kukës dhe në të njëjtën kohë ia dha dënimin e tretë xhudistes kosovare, që nënkuptonte humbje për të.
Vendimi i gjyqtarëve për dënimin e tretë ndaj Lorianës ka befasuar madje edhe trajnerin e xhudistes kroate.
Loriana Kuka reagoi, por edhe Fatos Tabaku që ishte trajner i saj në Portugali. Por vendimi i gjyqtarëve nuk ndryshoi.
Në vitet e fundit jo rrallë ka pasur vendime të dyshimta të gjyqtarëve që kanë shkuar në dëm të xhudistëve kosovarë.
