Julian Ahmataj debuton me tri pikë në rikthimin e tij në krye të Tiranës. Bardheblutë fituan 0-1 kundër Vllaznisë në "Klasiken" e futbollit shqiptar, e cila vlente për javën e tetë në Superligë dhe u zhvillua në "Kukës Arena".
Julian Ahmataj debuton me tri pikë në rikthimin e tij në krye të Tiranës. Bardheblutë fituan 0-1 kundër Vllaznisë në "Klasiken" e futbollit shqiptar, e cila vlente për javën e tetë në Superligë dhe u zhvillua në "Kukës Arena".
Për shkak se në "Loro Boriçi" u mboll bari i ri i fushës, dueli u zhvillua në stadiumin e Kukësit. Sfida ishte e luftuar, me raste dhe kartona. Në minutën e 84 shkodranët mbetën me një lojtar më pak, kjo pas daljes së Smajlit me karton të kuq.
Duhej minuta e fundit, e shtata shtesë, që Florent Hasani të shpikte një gol dhe ta kalonte topin pas krahëve të Mehidrit, për t'i dhënë tri pikë me vlerë Tiranës. Sulmi nga krahët bëri që mëngjarashi të çonte në festë tifozët bardheblu, me Tiranën që rikthehet te suksesi pas dy humbjeve dhe furtunës që solli shkarkimin e Orges Shehit.
Me një ndeshje më pak (derbi me Partizanin), Tirana me 13 pikë mban vendin e dytë, ndërsa Vllaznia me nëntë pikë qëndron në vendin e pestë dhe nuk sheh fitore në tre ndeshjet e fundit.
Superliga vijon nesër me tre duele, ndërsa gjithçka për javën e tetë nisi dje me fitoren e Egnatias 3-0 me Dinamon.
