Barcelona po bën përpjekje të rivalizojë Realin e Madridit jo vetëm në Spanjë, por edhe në Ligën e Kampioneve. Trajneri Ksavi Hernandez ka bërë një grup të mirë dhe për shkak të punës së tij klubi e motivoi duke i zgjatur kontratën. Por efikasiteti i disa futbollistëve ka shqetësuar klubin dhe vetë stafin. Konkretisht bëhet fjalë për sulmuesin kryesor, Robert Levandovski, i cili sezonin e kaluar ishte më efikas se këtë sezon, i cili nuk ka nisur aq mirë për polakun. Por sulmuesi ka ditur ta justifikojë gjendjen e tij dhe pozitat në skuadër, pavarësisht se media e cilëson atë “yll” në rënie, pasi në Bundesligë shënonte shumë më tepër sesa në La Liga spanjolle. Robert Levandovski nuk po kalon momentin më të mirë para portës.
Fillimi i tij në kampionat, pavarësisht se ka shënuar dy gola në katër raundet e luajtura deri më sot, nuk ka qenë brilant. Sulmuesi polak preferoi të kërkonte justifikime, duke vënë në pikëpyetje qasjen taktike të trajnerit të “Blaugranave”, Ksavi Hernandez. I pyetur nëse po mendon të shkojë në Arabinë Saudite në të ardhmen, “Leva” pranoi se është larg nivelit me të cilin ishte mësuar në Gjermani dhe se nuk është i njëjti futbollist që ishte gjatë kohës së tij në “Allianz Arena”. “Arabia Saudite? Tani as që e mendoj këtë. Jam super i lumtur në Barcelonë, në ekip, në qytet, me familjen time. Si person jam i lumtur”, ishin fjalët e lojtarit të Barcelonës, i cili gjithashtu la të kuptohet se nuk është më vrasësi që theu të gjitha rekordet e mundshme te Bajerni: “Para Barcelonës isha si makineri, këtu u bëra më njerëzor. Kam kontratë dyvjeçare këtu me opsion edhe një vit tjetër”. Në lidhje me MLS-në amerikane, ai shtoi: “Përpara pandemisë së Koronavirusit, ideja e MLS-së ishte e fortë në kokën time.
Por ndryshova mendje më vonë.” Nga këndvështrimi i Levandovskit, gjëja më e rëndësishme në këtë pikë në karrierën e tij është të kënaqet në maksimum. “Ka të bëjë me kujtimet, ruajtjen e çdo momenti, çdo fitoreje në kokën tuaj. Disa nga komentet për numrin e golave ??që shënova ishin të çmendura, veçanërisht në sezonin me 41 golave në Mynih (duke thyer rekordin e Gerd Müller në Bundesligë). Thyerja e rekordeve nuk është më qëllimi im kryesor. Gjëja më e rëndësishme është të ndihmoj skuadrën time të fitojë dhe të shijojë ndeshjet. Këto janë vitet e mia të fundit në botën e futbollit, dy, ndoshta tre. Mos më keqkuptoni: Unë ende dua të arrij sukses dhe të shënoj gola. Por nuk jam këmbëngulës si më parë”, përfundoi Levandovski.
