Rey Manaj është dëshira e Frosinones, klubit që sezonin e ri do luajë në Serie A. Pasi fitoi promovimin në ligën e më të mirëve në Itali, duke përfunduar Serinë B 2022-23 në vendin e parë në renditje, Frosinone po lëviz në treg për të forcuar skuadrën. Siç raporton Luca Cilli, verdheblutë po mendojnë të nënshkruajnë me Rey Manaj, i cili mbeti i lirë pas përfundimit konsensual të kontratës me Watford, që ndodhi më 8 shkurt 2023.
Këtë e konfirmoi vetë Guido Angelozzi, drejtori teknik i Frosinones, i cili pranoi se e kishte në plane sulmuesin. Lojtari i kombëtares shqiptare do të rikthehej në Itali pas eksperiencave të tij me Cremonese, Inter, Pescara, Pisa dhe Spezia. I lindur në vitin 1997, ai shënoi 5 gola në 30 paraqitje mes Serie A dhe Coppa Italia me fanellën e Spezias.
Te bardhezinjtë e Serie A ai kaloi në huazim nga Barcelona, teksa emri i tij u shënua në ekipin e parë të katalanasve, kjo pas problemeve të tyre dy sezone më parë. Kujtojmë se te Frosinone luan edhe shqiptari tjetër, Marvin Çuni.
