Carlo Ancelotti po shijon aventurën e dytë me Real Madrid. Trajneri italian fitoi trofetë më të rëndësishëm të sezonit të kaluar, ndërkohë që skuadra e tij synon sërish triumfin në Champions League.
Prej kohësh flitet për një interesim të drejtuesve të Federatës Braziliane të Futbollit. Të cilët kanë piketuar italianin si timonierin e duhur për “ringjalljen” e pesë herë kampionëve të botës dhe rikthimin te suksesi.
Vetë Ancelotti, flet hapur, pranon se e gëzon ideja e marrjes së kombëtares latine, por respekton Realin dhe ua kalon topin drejtuesve spanjollë.
“Nuk jam i befasuar nga ato që thuhen për mua. Nuk shqetësohem fare. Unë respektoj këtë klub dhe këtë ekip. Unë jam ende këtu. Për sa kohë që Real Madrid më lejon të jem këtu.
Ndihem shumë mirë. E ndjej dashurinë e presidentit, tifozëve dhe lojtarëve. Sigurisht që më bëhet qejfi që Brazili më dëshiron, por kontratat duhen respektuar. Dhe unë atë po bëj”, u shpreh trajneri i kampionëve të Spanjës dhe Europës.
