Milot Rashica është ‘shpërblyer’ me rritje të vlerës në tregun e transferimeve pas paraqitjeve fantastike që po tregon këtë edicion me Galatasaray, transmeton Gazeta Metro.
Në përditësimin e fundit të ‘transfermarkt.com’ tani vlera e anësorit kosovar është 7.50 milionë euro, teksa më herët ishte vlerësuar 7 milionë euro.
Kjo është hera e parë pas katër vitesh që Rashicës i ngritët vlera. Që nga viti 2019 kur ishte vlerësuar 35 milionë euro sa ishte pjesë e Werder Bremen, kartoni i tij ka shënuar ulje.
26-vjeçari në ndeshjen e fundit ndaj Konyaspor gjeti rrugën e rrjetës, derisa përveç golit bëri një paraqitje të mirë. Ai nuk luajti si zakonisht në krahun e djathtë por pas sulmuesve.
Ndryshe, skuadra e udhëhequr nga Okan Buruk sipas mediumeve turke po punon për ta transferuar në mënyrë permanente nga Norwich City.
Siç thuhet drejtuesit e Galatasaray janë duke menduar të dërgojnë në drejtim të klubit anglez ofertën prej pesë milionë eurove.
Rashica në 17 ndeshje në Superligën e Turqisë ka shënuar dy gola dhe ka dhënë katër asistime. /gazetametro.net
