Deputeti i Partisë Demokratike të Kosovës, Hisen Berisha, ka dalë në protestën e veteranëve të luftës së UÇK-së, për të qetësuar situatën pasi protestuesit kanë thyer rrethojat e Kuvendit dhe policia është detyruar të intervenojë.
Pasi që protestuesit kanë tentuar të thyejnë dyert e Kuvendit të Kosovës, deputeti Berisha ka folur para protestuesve duke thënë se janë deputetët ata që do të protestojnë në emër të tyre në Kuvendin e Kosovës, shkruan lajmi.net.
“Jemi ne ata që do të protestojmë për ju brenda institucioneve. Mbani nderin e luftëtarit dinjitoz, mos sulmoni institucionet e as policinë. Janë këta polic që na kanë mbrojtur në protesta në veri, e nuk janë këta që të luftojnë kundër juve”, ka thënë Berisha duke u munduar të qetësojë situatën.
Në ndërkohë, protestuesit gjenden ende para objektit të Kuvendit, ndërsa Njësia Speciale e Policisë së Kosovës ka dalë në vendin e ngjarjes për të mbajtur situatën në kontroll. /Lajmi.net/
