Lajm fantastik e ka quajtur shprehjen pro nismës rajonale të “Ballkanit të Hapur” nga kryeministri i Malit të Zi, Dritan Abazoviq, kryetari i odës ekonomike serbe, Marko Çadezh

Deklarata pro nismës rajonale “Ballkani i Hapur”, e kryeministrit të Malit të Zi, Dritan Abazoviq, është vlerësuar si lajm i jashtëzakonshëm për kryetarin e Odës Ekonomike të Serbisë (DSHK), Marko Çadezh.

Në mirëpritjen e tij ndaj qëndrimit të kryeministrit shqiptar në Mal të Zi, Çadezh shpreson që të mund të punojnë së bashku në të ardhmen rreth iniciativës së “Open Balkan”.

“Edhe para se të merrte mandatin, kryeministri aktual i Malit të Zi, ishte dikush që kuptonte se sa e rëndësishme është kjo iniciativë, dhe tani më duket sikur jemi në rrugën e duhur për të përfshirë tërë rajonin ashtu siç tani po bëjnë tri shtetet”, ka thënë ai, shkruan Tanjug.

Kryetari i odës ekonomike serbe, Marko Çadezh

Kështu është shprehur Çadezh në hapjen e konferencës “Burimet e ripërtëritshme të energjisë – mundësi për Serbinë dhe Izraelin” në SCC.

Ndryshe, Abazoviq, tashmë kryeministri i parë shqiptar në Mal të Zi, teksa e ka komentuar çështjen e idesë rajonale “Ballkani i Hapur”, është deklaruar pro kësaj iniciative.

Për të parin e ekzekutivit të Malit të Zi, “Ballkani i Hapur” është krijuar që brenda vetes t’i ketë gjashtë vendet e Ballkanit Perëndimor dhe që pjesë e kësaj iniciative rajonale duhet të jetë edhe Kosova.

Ilustrim

“Ballkani i Hapur është krijuar për gjashtë shtete, nuk është bërë për pesë shtete e gjysmë ose tre shtete e gjysmë, por për gjashtë shtete. Gjithkush që participon e prezanton vetveten dhe shtetin e vet. Mendimi im, ndoshta jam gabim, është se interesi më i madh në rajon është i Kosovës që të jetë në çdo iniciativë rajonale”, ka thënë Abazoviq.

Abazoviq ka hyrë në histori si kryeministri i parë shqiptar që udhëheqë qeverinë në Podgoricë.