Policia ka dhënë detaje në lidhje me shpërthimin e ndodhur sot në Lushnjë, në një kapanon që ishte në ndërtim.
Shpërthimi ndodhi në vendin e quajtur “Rrethrrotullimi i Plasmasit”, pasi gjatë punës një vinç, aksidentalisht ka prekur linjën e tensionit të lartë. Nga shpërthimi ndërroi jetë Landi Verçani, teksa janë plagosur 8 persona. Policia ka konfirmuar gjithashtu se mes të plagosurve është dhe deputeti Bujar Çela, i cili iu nënshtrua një ndërhyrjeje kirurgjikale dhe ndodhet jashtë rrezikut për jetën.
Njoftimi i policisë:
Fier/Informacion paraprak
Rreth orës 16:05 në vendin e quajtur “Rrethrrotullimi i Plasmasit”, në një kapanon në ndërtim dyshohet se gjatë punës, një vinçier duke drejtuar një vinç, aksidentalisht ka prekur linjën e tensionit të lartë dhe për rrjedhojë ka ndodhur një shpërthim i fuqishëm
Si pasojë e shpërthimit ka humbur jetën shtetasi L. V., dhe janë plagosur 8 shtetas mes tyre dhe deputeti B. Ç., të cilët ndodhen në spital për ndihmë mjekësorë.
Menjëherë nga Drejtoria Vendore e Policisë Fier dhe Komisariati i Policisë Lushnjë është ngritur një grup i posaçëm hetimor dhe nën drejtimin e Prokurorisë vijon puna për zbardhjen e rrethanave dhe shkakut të shpërthimit.
