Qeveria e Kosovës ka ndarë 30 milionë euro, për subvencionimin e pajisjeve efiçiente për ngrohje. Ministrja e Ekonomisë, Artane Rizvanolli, ka thënë se kjo është shuma më e lartë financiare që qeveria, në bashkëpunim më Bashkimin Evropian (BE), ka ndarë për subvencionimin e pajisjeve për sektorin e banimit.
Përmes kësaj skeme, ajo ka thënë se synohet jo vetëm të ulet çmimi i faturave, por edhe të rriten gjasat për furnizim të rregullt me energji elektrike.
“Sot po lansojmë thirrjen që subvencionon investimet në pajisje ngrohëse efiçiente; si pompë termike, kondicionerë ose klimë të tipit inventer me efiçiencë të lartë, kaldaja dhe stufa individuale me biomasë, si druri dhe veleti”, ka thënë Rizvanolli në një konferencë për medie.
Investimet në këtë masë janë kyçe për të rritur efiçiencën e energjisë në sektorin e banimit, ka thënë Rizvanolli, pasi sipas saj një pjesë e madhe e energjisë nga familjet konsumohet për ngrohje. Aplikimi ka nisur nga e premtja (22 shtator) në platformën online “E- Kosova” dhe do të zgjasë deri më 25 nëntor 2023.
