Presidentja Vjosa Osmani, me një postim në rrjetin social Twitter ka reaguar rreth tërmetit të fuqishëm që goditi sot Truqinë, ajo tha se ushtria e Kosovës është e gatëshme për mbështetje, shkruan Gazeta Metro.
Osmani tha se Forca e Sigurisë së Kosovës është e gatshme të ofrojë mbështetje autoriteteve turke.
Ajo shprehu edhe ngushëlimet e saja për të gjithë ata që u prekën nga kjo katastrofë natyrore.
“Zemra ime është për të gjitha komunitetet e prekura nga tërmeti shkatërrues në Turqi. Ngushëllimet më të thella për të gjitha jetët e humbura dhe uroj një shërim të shpejtë për të gjithë të prekurit. Solidaritet i plotë me njerëzit e Turqisë. Kosova është gati të ofrojë mbështetjen e nevojshme përmes FSK-së”, ka shkruar Osmani.
Gjithashtu edhe Qeveria e Kosovës u ka shprehur ngushëllime familjarëve të viktimave të tërmetit në Turqi e Siri.
Në komunikatën e tyre thuhet se mbesin me shpresë që ky numër të mos rritet më shumë, teksa të lënduarve u kanë uruar shërim të shpejtë.
“Republika e Kosovës dhe populli i Kosovës në këto çaste të vështira janë në gatishmërinë më të lartë për mbështetje dhe solidaritet. Ambasada e Republikës së Kosovës në Ankara do të vazhdojë të marrë informatat nga autoritetet vendore në Republikën e Turqisë nëse në qytetet e goditura kemi shtetas tanë dhe t’u ofrojë mbështetjen e nevojshme”, thuhet ndër të tjera.
Ndërsa ministri i Mbrojtjes, Armend Mehaj, ka njoftuar se forca që ai udhëheqë, është e gatshme për mbështetje ndaj shtetit dhe popullit turk në këto momente të vështira.
E kryetari i Aleancës për Ardhmërinë e Kosovës, Ramush Haradinaj, me një postim në rrjetin social ka reaguar pas tërmetit në Turqi.
Ai tha se është i prekur thellë nga kjo që ka ndodhë në Turqi, si dhe i propozoi Qeverisë që të ndaj një fond emergjent për ndihma humanitare, dhe ofrimin e ndihmës dhe mbështetjes profesionale të FSK’së.
Kujtojmë se mëngjesin e sotëm shteti turk është goditur nga një tërmet 7.8 ballë rihter.
Raportohet për mbi 500 viktima dhe 2 mijë të lënduar.
Mbi 1700 njësi banimi ose shtëpi tani më janë shkatërruar.
Presidenti Erdogan ka pranuar ngushëllime nga shumë liderë botërorë.
