Ministri i brendshëm Xhelal Sveçla ka reaguar në llogarinë e tij në rrjetin social Twitter për incidentin e sotëm në Leposaviq ku policia hapi zjarr ndaj dy të dyshuarve banorë lokalë serbë. Sveçla shkroi se reagimi i policisë ishte në vetëmbrojtje dhe njoftoi se hetimi për incidentin ka nisur duke theksuar edhe përfshirjen e Inspektoratit të Policisë së Kosovës, shkruan Gazeta Metro.
Ministri i Punëve të Brendshme, Xhelal Sveçla, ka shkruar në rrjetin social Twitter për incidentin e fundit ku tha se është i shqetësuar pas incidentit të sotëm në komunën e Leposaviqit.
“Jam thellë i shqetësuar nga incidenti i fundit në Leposaviq. Dy persona në veturën e tyre tentuan t’i shmangen një pike të kontrollit. Ata goditën veturën e Policisë së Kosovës qëllimisht duke i rrezikuar jetët e policëve. Oficerët e Policisë së Kosovës ishin të detyruar të që hapnin zjarr në drejtim të veturës për të neutralizuar situatën. Hetimi tashmë ka nisur dhe Inspektorati i Policisë së Kosovës është përfshirë aktivisht. Dua të jem i qartë: Çfarëdo forme e dhunës ndaj policisë tonë nuk do të tolerohet. Mbrojtja e qytetarëve dhe zbatimi i ligjit është prioriteti ynë kryesor” ka shkruar ministri.
Siç ka njoftuar Policia e Kosovës të hënën në pikën e kontrollin të tyre në Bistricë dy persona me veturë kanë goditur veturën e patrullës së policisë duke i rrezikuar dhe policët që kanë hapur zjarr në drejtim të tyre në reagim.
Sipas mediave serbe njëri nga të dyshuarit është plagosur në gjoks nga njëra predhë e armës së zjarrit dhe tani është në trajtim në spitalin e Kraljevo në Serbi dhe është jashtë rrezikut për jetë. I dyshuari nuk është plagosur në këtë incident.
Nuk ka shpjegim si ka ndodhur rasti as nga partia serbe në Kosovë, Lista Serbe, as nga e ashtuquajtura ‘Zyrë për Kosovë e Metohi’ pranë qeverisë së Serbisë, që nuk i cekin rrethanat e incidentit. Që të dyja pretendojnë se ishin njësitet speciale të Policisë së Kosovës që kishin hapur zjarr dhe kërkuan që të largohen këto njësi, dhe të hiqen pikat kontrolluese të këtyre njësiteve që i cilësuan si ilegale./gazetametro.net
