Michael Martens, gazetar i Frankfurter Allgemeine Zeitunge, ka thënë se, gjatë takimit që pati me diplomatët perëndimorë, kryeministri Albin Kurti, ka kërkuar nga Bashkimi Europian dhe Shtetet e Bashkuara të Amerikës, që të garantojnë njohjen e Kosovës nga pesë shtetet mosnjohëse të BE’së, shkruan Gazeta Metro.
Rreth kësaj ka reaguar ish-zyrtari i lartë, Petrit Selimi, i cili përmes një postimi në Twitter, ka thënë se ky është elementi më i rëndësishëm për t’u diskutuar.
Ai ka shtuar se njohja e Kosovës nga Spanja, Greqia, Rumania, Sllovakia dhe Qipro, është gati esenciale.
“Unë mendoj se ky është elementi më i rëndësishëm për ta diskutuar në tavolinë. BE/SHBA duhet që me të vërtetë të fillojnë nga kjo dhe të punojnë drejt obligimeve. Meqenëse nuk ka asnjë perspektivë reale të BE-së për Kosovën në 20 vitet e ardhshme, sigurimi i njohjeve të Spanjës, Greqisë, Rumanisë, Sllovakisë dhe Qipros, është gati esenciale për Kosovën”, ka thënë Selimi./gazetametro.net
