Policia e Kosovës, ka njoftuar se gjatë ditës së sotme, në Bistricë të Leposaviqit, një veturë nuk i është bindur urdhrave të policisë për tu ndalur, e cila gjatë lëvizjes ka goditur automjetin e PK’së, duke rrezikuar drejtpërdrejtë jetën e zyrtarëve policorë, shkruan Gazeta Metro.
Në komunikatën e PK’së shtohet se zyrtarët policorë për të neutralizuar rrezikun ndaj tyre, kanë shtënë me armë zjarri.
Po ashtu në komunikatë shtohet se, personat e dyshuar së bashku me mjetin e tyre janë larguar nga vendi i ngjarjes.
Komunikata e plotë:
KOMUNIKATË PËR MEDIA
Prishtinë, më 23 janar 2023
Sot, më 23 janar në Bistricë të Leposaviqit, një njësi policore ka qenë e caktuar me detyrë zyrtare në pikë kontrolli, me qëllim të ruajtjes së rendit dhe sigurisë publike si dhe parandalimit të krimit e kontrabandës.
Njësia policore e cila ka qenë në pikë kontrolli, gjatë realizimit të detyrave policore ka tentuar ta ndalojë veturën në fjalë, e cila gjatë lëvizjes ka goditur automjetin e Policisë së Kosovës duke rrezikuar drejtpërdrejt edhe jetën zyrtarëve policorë, të cilët për të neutralizuar rrezikun ndaj tyre kanë shtënë me armë zjarri.
Personat e dyshuar, së bashku me mjetin e tyre janë larguar nga vendi i ngjarjes, përderisa hetimet lidhur me rastin janë duke u kryer, në bashkëpunim dhe koordinim me organet e drejtësisë.
Lidhur me rastin, Policia e Kosovës ka njoftuar edhe Inspektoratin Policor të Kosovës për procedura të mëtejme. /gazetametro.net
