Aeroporti Nikola Tesla i Serbisë do të furnizohet me energji elektrike të prodhuar në një termocentral diellor 1 MW. Objekti u instalua pranë kompleksit të aeroportit, dhe përbëhet nga afro 3000 panele fotovoltaike të shtrira në një pllajë prej 15900 metrash katrorë.
Prodhimi vjetor i pritshëm i termocentralit diellor është rreth 1,130,000 kilovat-orë (kWh) energji elektrike e gjelbër, e mjaftueshme për të furnizuar rreth 430 familje. Investimi do të zvogëlojë emetimet e CO2 të aeroportit me 900 tonë në vit, tha operatori i aeroportit të Beogradit, anëtar i kompanisë franceze Vinci Airports, raporton SCAN tv.
Vinci ka reduktuar emetimet e CO2 me 28% që nga viti 2018 duke instaluar termocentrale diellore në rrjetin e saj të aeroporteve. Kapaciteti total i instaluar i objekteve arriti në 30 MW.
Instalimi i termocentralit PV në Beograd është pjesë e përpjekjeve globale të aeroporteve Vinci të drejtuara drejt tranzicionit energjetik.
François Berisot, CEO i Aeroportit të Beogradit, tha se me operacione të qëndrueshme, kompania përpiqet të arrijë zero emetime neto deri në vitin 2050.
Që nga viti 2018, aeroporti ka zbatuar projekte mjedisore duke përfshirë instalimin e një termocentrali me gaz natyror, një impiant të përpunimit të mbetjeve të ngurta dhe një impianti të përpunimit të ujërave të zeza, tha Berisot.
Në nëntor 2020, Aeroporti i Beogradit iu bashkua programit të Akreditimit të Karbonit të Aeroportit – ACA për menaxhimin e emetimeve të dioksidit të karbonit, dhe mori një certifikatë të nivelit 1 për objektin, ndërsa certifikimi i nivelit 2 është duke u zhvilluar. Gjithashtu, u nis një nismë për të zbatuar standardin 50001 mbi efikasitetin e energjisë, i cili do ta vendosë Aeroportin e Beogradit ndër të paktat kompani në vend që kanë lidhur operacionet e tyre me të.
Vlen të përmendet se në fillim të vitit, aeroporti Nikola Tesla vuri në punë një impiant rigjenerimi me gaz natyror për prodhimin e nxehtësisë, energjisë elektrike dhe ftohjes.
