Gjykata Themelore në Prizren ka aprovuar kërkesën e Prokurorisë për caktimin e masës së sigurisë ndaj 31-vjeçarit, Liridon Berisha, i cili dyshohet se ka plagosur me armë zjarri kunatën e tij, raporton Gazeta Sinjali.
Sinjali mëson se Berishës i është caktuar masa e paraburgimit në kohëzgjatje prej 30 ditësh për shkak të veprave penale “Vrasje në tentativë” dhe “Mbajtje në pronësi, kontroll apo posedim të paautorizuar të armëve”.
Berisha dyshohet se ka shkrepur me armë zjarri në drejtim të kunatës së tij 25-vjeçare, pas zënkës familjare që lindi për motive ende të panjohura.
Pas arrestimit, me rastin e kontrollit policor, të dyshuarit i është gjetur një armë, e cila më pas është konfiskuar.
Rastin për Sinjalin e ka konfirmuar Haxhi Kabashi, komandant në stacionin Policor në Prizren. “Në përleshje e sipër në shtëpi, i dyshuari ka pasur posedim një armë dhe ka shkrepur në moment duke goditur kunatën e tij. Personi është arrestuar, arma gjithashtu është konfiskuar nga Policia dhe rasti po hetohet në hetime rajonale”, tha Kabashi.
