Në Kosovë viteve të fundit është rritur dukshëm numri i rasteve të bashkëjetesave martesore të personave nën moshën 18 vjeç.
Vetëm gjatë pesë muajve të parë të këtij viti 15 vajza të mitura, nën moshën 18 vjeçare janë bërë nëna.
Këtë ka bërë të ditur për Front Online, drejtori i Klinikës së Gjinekologjisë, Jakup Ismajli.
Ismajli tha se gjatë vitit që lamë pas, 57 paciente të mitura kanë lindur në këtë klinikë.
“Nën moshën 18 vjeçare, në vitin 2021 kanë lindur 57 paciente kurse në 5 muajt e vitit 2022 kanë lindur gjithsej 15 paciente nën moshën 18 vjeç”, deklaroi Ismajli.
Drejtori i kësaj klinike tha se mosha e vajzave të mitura që janë bërë nëna ka filluar nga 15 deri 18 vjeç.
“Numri më i madh i lindjeve nën moshën 18 vjeç më shumë se gjysma kanë lindur me prerjet cezariane. Mosha e pacienteve që kanë lindur gjatë këtyre muajve ka qenë nga 15 deri 18 vjeç”, potencoi Ismajli.
Sipas Ismajlit, për secilin nga këto raste lajmërohet policia, prindi, dhe punëtorët social.
Sipas Fondit të Kombeve të Bashkuara për Fëmijët, UNICEF, një vajzë nën 18 vjeç është pesë herë më shumë në rrezik të vdesë gjatë shtatzënisë apo lindjes, se sa një grua në të 20-at./Front Online/
