Deputeti i Partisë Demokratike të Kosovës, Bekim Haxhiu, ka drejtuar pyetje në drejtim të Ministrit të Shëndetësisë, Rifat Latifi lidhur me punësimin e paraardhësit të tij, ish-ministri Arben Vitia.
Sipas deputetit Haxhiu, Vitia ka filluar punën në kompaninë ‘Olive’ dhe tha se është konflikt interesi punësimi i tij në këtë kompani.
“Në media u raportu se ish ministri Arben Vitia ka filluar punën në kompaninë Olive në foton e publikuar në media ai shihet në foto me stafin e kësaj kompanie. Në aplikacionin për licencim të spitalit Olive në Ministrinë e Shëndetësisë, Arben Vitia figuron staf i kësaj kompanie. Sipas raportimeve paga e ish ministrit pritet të jetë e majme mbi 5 mijë euro. A jeni në dijeni se ky veprim i ish ministrit Arben Vitia është konflikt i interesit pasi që Olive është licencu nga MSh për testet PCR”, tha Haxhiu.
Ndërkaq, ministri Latifi tha se nëse është shkelur ligji, organet përkatëse do të merren më të.
“Nëse është shkel ligji organet përkatëse do të merren me to. Unë mendoj që çdo qytetar i Republikës së Kosovës ka të drejtë të punoj aty ku ka dëshirë qoftë në sektorin privat apo shtetëror”, tha Latifi.
Ndërkaq, deputeti Haxhiu tha se edhe mos veprimi përbën konflikt interesi për Latifin.
