Kryeministri i Kosovës, Albin Kurti, gjatë vizitës së tij në Shtetet e Bashkuara të Amerikës ka vendosur lule të freskëta dhe ka bërë homazhe te varret e Fan Nolit dhe Faik Konicës, në Boston të Massachusetssit.
Në një njoftim për media, thuhet se pas kësaj Kurti ka vizituar Katedralen Shën Gjergji, në të cilën ka shërbyer Fan Noli si kryepeshkop dhe bibliotekën ku ruhen librat, dorëshkrimet dhe gjësendet e tjera të tij.
“Në katedrale, kryeministri Kurti është takuar me komunitetin shqiptaro-amerikan dhe përfaqësues të shoqatës shqiptare ‘Vatra’, një ndër themeluesit e së cilës ishte Fan Noli, në nderim të figurës së të cilit ai ka mbajtur një fjalë rasti”, thuhet në njoftimin e Zyres së Kryeministrit.
Tutje është thënë se shefi i ekzekutivit ka thënë se në Katedralen e Shën Gjergjit, Fan Noli ka mbajtur për herë të parë një meshë në gjuhën shqipe në Boston, mbasi ishte dorëzuar prift në mars të vitit 1908, katër vjet para shpalljes së pavarësisë së Shqipërisë, më 1912.
“Ky fakt na i thotë të gjitha. Ende pa e pasur shtetin, shqiptarët ju patën juve, këtu”, thuhet se ka thënë kryeministri Kurti.
Tutje është thënë se Kurti ka çmuar kontributin e madh të kishës së Shën Gjergjit edhe në krijimin e shtetit të Kosovës.
Në njoftimin e ZKM-së është thënë se sipas shefit të qeverisë, organizimi për futjen e Shqipërisë në Lidhjen e Kombeve, ku Fan Noli ishte delegat, nuk ka qenë më i lehtë se çfarë është sot vështirësia për ta anëtarësuar Kosovën në Organizatën e Kombeve të Bashkuara.
Andaj, nuk është e papritur që sot pothuajse secili e secila e ka në mendje se si ia dolën ata para nesh në mënyrë që të organizohemi sërish edhe ne, ka theksuar ai, teksa ka folur për të arriturat në një vit qeverisje”, është thënë tutje.
