Kalush Orchestra - përfaqësuesi i Ukrainës në Eurovizion 2022 - ka prekur telat e zemrës, edhe pse pak e kuptojnë tekstin. Këngëtari Oleh Psiuk repon për nënën e tij Stefania - personazhi kryesor i këngës - dhe lavdëron duart e saj të forta që e inkurajuan atë në kohë të mira dhe të këqija. E shkruar para pushtimit të Ukrainës nga Rusia, kënga ka marrë një kuptim të ri tani në kohën e luftës. Tani lexohet si Nënë Ukraina që mbron fëmijët e saj në të njëjtën kohë që ata përpiqen ta mbrojnë atë.
Kënga folk-rep në gjuhën ukrainase nuk ka asnjë anglisht. Por shikuesit mund ta kuptojnë se "mamo" - e përsëritur në kor - do të thotë nënë. Inskenimi e bën të dukshme dhimbjen që përmban kënga. Në ekranin LED shohim sy të mëdhenj, të përlotur nga pranvera e humbur, dhe në dyshemenë LED duar të rrudhosura - një nënë që përqafon fëmijët e saj në momentin e tyre më të vështirë.
Në muajt e fundit anëtarët e Kalush Orchestra kanë qenë të përfshirë në përpjekjet luftarake të Ukrainës - nga ndihma e njerëzve për t'u zhvendosur deri te pjesëmarrja aktive në mbrojtjen territoriale të vendit. Ata morën paraprakisht leje speciale për t'u larguar nga Ukraina për në Eurovizion dhe turneun promovues. Kjo, kryesisht për shkak të prestigjit dhe rëndësisë së Eurovizionit si në Ukrainë, ashtu edhe në Rusi.
Ekziston një supozim se artistët do të marrin mbështetje dërrmuese nga publiku i televotimit. Bota ka parë imazhet e tmerrshme që dalin nga Ukraina. Po ashtu, vendet votuese, përfshirë Poloninë, Letoninë, Lituaninë dhe Estoninë, do të jenë veçanërisht më të prirura të votojnë për Ukrainën, për shkak të një kuptimi të përbashkët të shtypjes nga Moska.
Një fitore duket e mundshme, por nuk është e garantuar. Juria profesionale - e cila përbën 50% të rezultateve - ka një tendencë për të votuar me profesionalizëm dhe jo me zemrën e tyre.
Vetëm pak orë na ndajnë nga shpallja e fituesit, këshu që na mbetet të presim!
Përshtatur nga Wiwibloggs
