Debati mes kandidatëve për kryetar të Sllovenisë, Janez Jansha dhe Robert Golobi, ka vazhduar edhe mbrëmë, pas publikimit të aferës financiare të këtij të fundit, ku dyshohet të jetë i përfshirë edhe ambasadori Martin Berishaj.
Ndonëse nuk e ka përmendur ambasadorin nga Kosova, kryeministri aktual i Sllovenisë, Janez Jansha, e ka pyetur mbrëmë kundërkandidatin e tij, Robert Golob, se nga është duke u financuar.
“E gjithë Lubjana është ndriçuar nga posterët e një partie të krijuar rreth një muaj më parë dhe nuk ka asnjë deputet, kryetar apo këshilltar komunal. Sipas ligjit slloven, votat elektorale në zgjedhjet lokale dhe parlamentare janë burim i financimit të partive. Pra, nga erdhën gjithë këto para?”, e ka pyetur Jansha – Golobin në një debat televiziv.
Vlen të përmendet se Jansha dje ka shpërndarë edhe një deklaratë të gazetarit Bojan Pozhar, i cili tha se Sllovenia dhe Ballkani po “dridhen” nga afera për shpëlarjen e parave mes Berishajt e Golobit, përcjell Demokracia.com.
Ndërkohë, televizioni slloven, Planet Tv, të mërkurën raportoi se rreth 600 mijë euro cash janë bartur prej Malit të Zi për në Slloveni për t’iu dorëzuar Golobit dhe se rolin e “mushkës” ose të transportuesit të parave e kishte kryer ambasadori i Kosovës, Martin Berishaj.
Sipas këtij televizioni, në xhirollogarinë MB Consulting, në pronësi të Berishajt të regjistruar në Mal të Zi, nga një kompani serbe janë derdhur në baza të rregullta prej 5 mijë deri në 50 mijë euro për çdo muaj.
Ky televizion ka raportuar se një pjesë e dokumentacionit të siguruar tregon se ngjarja në fjalë është shtrirë në vitet 2019 dhe 2020.
Pagesat ishin kryer nga dega për Serbi e GEN-I (kompani energjetike) te kompania private MB Consulting në Mal të Zi, me të cilën kompania serbe ka marrëveshje për këshillime.
Lidhur me rastin ka reaguar edhe ambasadori Berishaj, i cili ka paralajmëruar padi ndaj këtij mediumi, por nuk ka mohuar dhe as pohuar që kompania në fjalë është e tij.
Ndërkaq, presidentja Vjosa Osmani, në një përgjigje ndaj një gazetari, fillimisht e cilësoi si “dezinformatë” dhe “konstatim” këtë çështje, por më vonë e zbuti qëndrimin e saj, duke thënë se i ka kërkuar raport ambasadorit Berisha.
Njëjtë edhe kryeministri Kurti, i cili e ka mik ambasadorin Berishaj, duke cituar fjalët e këtij të fundit, tha se raportimet e mediave sllovene janë të pavërteta.
