Asociacioni i Komunave të Kosovës me një postim ne rrjetin social Facebook kanë njoftuar se e mirëpresin vendimin e Gjykatës Kushtetuese për reformat në arsim të ndërmarra nga Komuna e Kamenicës vite më parë, komunave njëjtën kohë i kërkojnë dikastereve qeveritare që të mos interferojnë në punët e komunave, shkruan Gazeta Metro.
Më tutje nga ky organ shprehin brengën se në disa raste komunave po u ndërhyhet pa konsultime të nevojshme nga dikasteret e ndryshme qeveritare.
“Komunat e Kosovës, në funksion të realizimit të detyrave dhe përgjegjësive të veta, kanë hasur dhe po hasin në shumë raste me ndërhyrjen e Qeverisë, më saktë ministrive, në kompetencat e komunave edhe pse të njëjtat janë paraparë shumë qartë në Kushtetutë, akte ligjore dhe nënligjore. Dhe këto ndërhyrje po bëhen pa konsulta me komunat”, thuhet në reagim
Ndër të tjera nga ky asociacion njoftojnë se pavarësia e komunave dhe legjislacionet ndërkombëtare që rregullojnë qeverisjet lokale nuk po respektohen sa duhet nga niveli qendror.
“Ne, si Asociacion, e kemi diskutuar edhe në të kaluarën dhe kemi shpresuar që disa nga ministritë do ta ndryshojnë qasjen por kjo nuk po ndodhë. Ndërhyrja në kompetenca të komunave po vazhdon. Autonomia Lokale e përcaktuar me Kartën Evropiane për Pushtet Lokal nuk po respektohet. Kjo ndërhyrje në kompetencat e komunave u vërtetua edhe me vendimin e fundit të Gjykatës Kushtetuese ndaj ndërhyrjes së Ministrisë së Arsimit në kompetencat e komunës së Kamenicës”, shkruhet aty.
AKK më tutje arsyeton se vendimi i komunës së Kamenicës ishte në përputhje me legjislacionin përkatës, dhe se ministria në këtë rast kishte tejkaluar kompetencat.
“Vendimi i Gjykatës Kushtetuese, në të cilin konstatohet se MASHTI ka tejkaluar kompetencat e saja dhe ka cenuar përgjegjësitë komunale, përkatësisht ka ndërhyrë në kompetencat e komunës së Kamenicës, e konfirmon atë që ne vazhdimisht e kemi thënë se sistemi ynë kushtetues dhe ligjor, është më se i qartë sa i përket funksionimit dhe raporteve ndërmjet nivelit lokal dhe atij qendror”, thuhet në reagim.
Nga ombrella e komunave të Kosovës mbesin me shpresë që ky rast të shërbejë si mësim edhe për ministritë tjera.
“Prandaj, ne si AKK e përshëndesim vendimin e fundit të Gjykatës Kushtetuese dhe shpresojmë që ministritë e linjës do të marrin mësim nga përfundimi i rastit të MASHTI dhe më nuk do të ndërhyjnë në kompetencat e komunave në Republikën e Kosovës”, përfundon njoftimi i AKK
