DURRËS - Një person me emrin Ilirjan Cauli i është drejtuar komisariatit të Policisë Durrës duke denoncuar zhdukjen e motrës.
Ai ka deklaruar se është vëllai i Aureta Caulit dhe ka denoncuar se që nga dita e hënë familja e tij ka humbur kontaktet me motrën e cila ishte nisur për në Pogradec, pasi ishte në proces divorci.
Cauli rrëfen se motra i ka dërguar në telefon dy foto nga spitali, në gjendje jo të mirë shëndetësore.
Ndërsa më pas ka telefonuar edhe një të afërmin e tyre ku i ka treguar se është marrë peng nga katër veta.
Edhe pse i është drejtuar menjëherë policisë në Durrës për të kërkuar ndihmë për fatin e motrës së tij, Ilirjan Cauli thotë se ka ndeshur në neglizhencën dhe shpërfilljen e autoriteteve.
"Që atë ditë nuk kemi pasur me kontakte me të. Ditën e mërkurë kam bërë denoncim në stacionin e Policisë Plazh, Durrës, për humbjen e motrës. Ditën e enjte motra më dërgon 2 foto në WhatsApp që ishte në spital duke marrë serum vetë dhe pastaj i fiket telefoni. Shkoj në polici për të çuar ato foto që mund ta zbulonin ca spitali ishte, por përgjigjja e punonjësve të policisë më la për të dëshiruar, s'kemi ç'e duam foton, do pyesim spitalet me këtë emër dhe të themi. Kur nëpër urgjencat s'të kërkojnë ndonjë mjet identifikimi për të marrë serum dhe ata mund ta kenë regjistruar me emër tjetër. Sot nga ora 10 kishte marrë një kushëri në telefon, i kishte thënë që më kanë marrë 4 veta, vetëm të shoh pak fëmijët për herë të fundit se s'jam mirë. Shkoj përsëri në komisariat tani dhe asnjë lajm prej tyre kur shumë mirë ata mund ta gjejnë nga tabulatet telefonike nga merr në telefon", rrëfen Ilirjan Cauli.
Sakaq, i kontaktuar me telefon nga Syri.net, ai deklaron se ndodhet në këto momente në komisariatin e policisë Durrës, ku edhe pret me shpresë se do të marrë ndonjë informacion për fatin e motrës së tij.
