Miliona njerëz në Mbretërinë e Bashkuar vuajnë nga diabeti dhe simptomat më të zakonshme janë etja, lodhja, shkuarja më shpesh në tualet dhe humbja e peshës.
Por, një ekspert tani ka pohuar se ju mund ta dalloni sëmundjen edhe përmes disa shenjave në sy.
Sheqeri i lartë në gjak është një çështje e zakonshme për diabetikët pasi sasia e sheqerit në gjak kontrollohet nga insulina e cila prodhohet nga pankreasi, shkruan The Sun, transmeton Klankosova.tv.
Dr.Shane Kannarr, recensues kryesor mjekësor për ekspertët e shikimit “All About Vision” tha se niveli i lartë i sheqerit në gjak mund të prekë sytë e njerëzve.
“Sheqeri i lartë në gjak mund të ndryshojë enët e gjakut në retinën tonë ose të shkaktojë ënjtje në indet e syve që na ndihmojnë të shohim, duke shkaktuar shikim të paqartë”.
“Sheqeri i lartë në gjak gjithashtu mund të ndryshojë formën e thjerrëzave tona dhe nëse nuk trajtohet, mund të çojë në probleme si katarakti, glaukoma dhe retinopatia”, u shpreh ai.
Ai shpjegoi se ekzistojnë katër simptoma kryesore që mund të shfaqen në sy nëse keni diabet.
Kannarr tha se shikimi i paqartë ose i shtrembëruar, pikat e errëta në shikim, ndezjet e dritës dhe vrimat në shikimin janë disa nga shenjat.
Tutje, ai shtoi se diabeti është një sëmundje që prek enët e vogla të gjakut dhe se sheqeri i tepërt i gjakut dëmton rrjedhjen e tij.
