Të hënën demokratët do të tregojnë sërish forcën në aktin e radhës të asaj që e quajnë mosbindje civile.
Njësoj si në tubimin e fundit edhe në 23 dhjetor, demokratët do të shpërndahen në 5 pika në Tiranë dhe do të synojnë bllokimin e trafikut në kryeqytet.
Protesta do të nisë në orën 17:00 dhe do të bllokohen disa nyje kryesore në Tiranë, të cilat janë kryqëzimi te Xhamia e Namazgjasë, Pallati me Shigjeta, sheshi Willson, rrethrrotullimi i Zogut të Zi dhe rruga pranë Bashkisë Tiranë.
Edhe këtë herë demokratët do të shpërndahen në këto 5 pika dhe pritet që tubimi të zgjasë rreth tre orë. Kërkesa edhe në këtë protestë vijon të jetë e njëjtë, qeveri teknike dhe zgjedhje të lira dhe të ndershme.
Për herë të parë pas gati një viti mes protestuesve në shesh pritet të jetë dhe Sali Berisha, lideri i opozitës i cili prej 27 nëntorit ka rifituar lirinë.
Ndërkohë, Berisha zhvilloi një takim në degën numër 9 në Tiranë mbrëmjen e së dielës.
Gjatë fjalimit të tij, ai u ndal dhe te mosbindja civile e opozitës më 23 dhjetori në Tiranë.
Berisha u bëri thirrje qytetarëve që të bashkoheshin në kryeqytet për “ditën e betejës”.
“Nesër, në orën 17:00 është dita e betejës sonë, të gjithë sa janë qytetarët e Tiranës dhe të mbarë Shqipërisë vërshojnë në Tiranë në mosbindje civile për të dridhur themelet e narkoshtetit, narkodiktaturës dhe për të ecur, për ta festuar vitin e ri të sigurt, në fitoren që meritojnë”, tha Berisha.
