Dy aktorët, Kejdi Gishto dhe Juxhin Plovishti, ishin të ftuar një ditë më parë në emisionin “Ftesë në 5” për të zbuluar disa nga të rejat e spektaklit më të madh të humorit, “Portokalli”, që do të nisë më 6 tetor në ekranin e Top Channel.
Ata treguan se do të jenë bashkë në një rol, por pa zbuluar shumë detaje duke e lënë surprizë për publikun.
Ky është një sezon i ri, ka ndryshime në moderim. Diçka do të na tregoni nga ato mbledhjet e përditshme që bëni”, iu drejtua moderatorja e njohur, Bieta Sulo.
Kejdi u shpreh se ‘ka personazhe të rinj, ka numra të rinj, ka edhe numra ekzistues që kanë kohë që janë bërë por që janë të suksesshëm’.
Më pas aktori i humorit shprehet se ‘kemi moderatore të re’, duke iu referuar Kiara Titos. Madje duke qeshur ai shton ‘nuk ka ikur Salsano’.
“Cubi nuk donte t’i zinte vendin Kiarës, e këto muhabete domethënë”, vijoi Gishto, duke shkaktuar të qeshura në studio.
Kujtojmë se u përfol shumë që Salsano Rrapi nuk do të jetë më pjesë e “Portokallisë” dhe shkak u bë edhe promo e emisionit ku ai nuk ishte. Por jo vetëm kaq pasi u aludua se largimi i aktorit dhe moderatorit të dashur për publikun, lidhej edhe me hyrjen e re, Kiarës.
Që të dy i hodhën poshtë këto thashetheme gjatë një bisede në emisionin “Ndryshe”, në Top Albania Radio.
Po në këtë emision, aktorja e njohur Cubi Metkaj e pyetur nëse do donte të moderonte “Portokallinë”, ajo u përgjigj “po” dhe me humor shtoi: “Ma zuri vendin ajo e reja”.
