Këshilltari i presidentes, Vjosa Osmani, Bekim Kupina e ka demantuar publicistin Nexhmedin Spahiun, pasi ky i fundit foli për pagën e Osmanit duke e krahasuar me pensionin minimal në Kosovë, e pastaj duke krijuar një analogji me pagën e presidentit serb, Aleksandër Vuçiq.
Kupina tha se Vuçiq mund të paguhet më pak, por mbetet i lidhur me bandat e krimit.
“Dihet se Presidentja ka vetëm një burim të ardhurash dhe drejton një institucion, në të cilin paratë e taksapaguesve trajtohen me përgjegjësi maksimale. Në të kundërtën, Vuçiqi mund ta marrë zyrtarisht një pagë të një niveli tjetër, porse mbetet i lidhur me bandat kriminale sikurse edhe nivel të lartë të korrupsionit. Serbia mund të ketë të hyra të shumta, porse i përdor për investime në ushtrinë e saj me armatim nga Rusia, duke e kërcënuar gjithë rajonin”, ka shkruar Kupina.
Sipas Kupinës, Spahiu duke tentuar ta kritikojë Osmanin, ka bërë lavde në drejtim të presidentit të Serbisë.
“Paga që e merr Presidentja është 2700 euro (e jo 4000) dhe kjo e dhënë është publike.
Ai ka drejtuar kritika ndaj nivelit të pagës së Presidentes (pagë të cilën nuk e ka caktuar Presidentja Osmani) e në këtë kontekst ka lavdëruar presidentin e Serbisë, i cili sipas tij merr pagë më të ulët”, ka shtuar tutje Kupina.
